Eerste wenner van Vaalweekblad se nuwe kompetisie
Vaalweekblad se nuwe kompetisie het afgeskop en die eerste wenner van 'n R500 geskenkbewys van Engen Arcon Park Convenience Centre is aangewys. Angie Parkersons van Vereeniging is die eerste wenner. Wie gaan die volgende wenner wees?
Vaalweekblad hou daarvan om geleenthede om pryse te wen aan ons lesers te bied. Vrydag (14 Julie) het ons nuwe kompetisie: “Soek die Ster” afgeskop.
Angie Parkersons van Vereeniging het verlede naweek die DBV se Wiggle Waggle dag by Stonehaven on Vaal ondersteun. Angie is reeds in die nuuste uitgawe van Vaalweekblad (14 Julie) as ons eerste “Soek die Ster” wenner aangewys.
Angie word gevra om Elsje Vermeulen by 083 417 1059 te kontak sodat sy haar prys kan ontvang. Indien vriende of familie van Angie hier lees, word hulle gevra om Angie in kennis te stel asb.
“Soek die Ster” werk so:
Vaalweekblad woon deur die week en oor naweke verskeie geleenthede by. Soms weet mense wanneer hulle deur ‘n Vaalweekblad fotograaf afgeneem word, en soms nie. Dit is deel van die pret van dié nuwe kompetisie.
Een van die foto’s in die week se koerant gaan met ‘n ster versier word, en as jy die gelukkige persoon is by wie die ster geplaas word, is jy die wenner.
Die kompetisie gaan oor ‘n paar weke strek en daar sal weekliks ‘n nuwe prys op die spel wees.
Die week se prys was ‘n R500 geskenkbewys van Engen Arcon Park Convenience Centre, en sal ook die prys wees vir die volgende kompetisie in die uitgawe van 21 Julie.
Wie kan nie doen met so ‘n lekker prys nie? Moet dus nie Vrydag se Vaalweekblad misloop nie, jy is dalk die ster!
