Mense wat goeie kos, ‘n mooi riviertoneel en aangename geselskap kan waardeer, het Sondag, 9 Julie by L’Amour Rouge Restaurant en koffiewinkel in Vaaloewer bymekaargekom vir ‘n heerlike ontspanne dag waarby ‘n plaaslike deurgangshuis ook gebaat het.
Sjef Rudi, eienaar van die restaurant en sy personeel, het reggestaan om gaste op ‘n smaaklike buffet-ete te trakteer, maar die geleentheid is ook benut om die Lochvaal Emfuleni Welfare Centre se dienste onder die publiek se aandag te bring. ‘n Deel van die dag se inkomste is aan die sentrum geskenk.
Onder die gaste wat die ete bygewoon het, was die beeldskone model Charné van Emmenis, Mej. Junior Toerisme SA van 2019 en Junior Miss Rainbow Nation 2018, wat haar oog nou op die gesogte Miss World SA-titel het. Charné is bekend daarvoor dat sy graag aan uitreik-aksies vir mense in nood deelneem. Haar persoonlike projek om sagte speelgoed vir kinders met terminale kanker in te samel het ook al landwyd aandag getrek.
Sjef Rudi bedank Charné en almal wat L’Amour Rouge se uitreikdag bygewoon het vir hul belangstelling en ondersteuning.