VAALPARK. – Die dansers van Georgina’s Dance Studio het rede om breed te glimlag en super trots te wees.

Hulle het onlangs by die Wêrelddanskampioenskappe in Braga, Portugal uitstekend gevaar.

Die kampioenskappe het van 30 Junie tot 7 Julie plaasgevind. Meer as 7 500 dansers van 50 lande het deelgeneem.

Die blinkste ster onder die Vaaldriehoekers was Cebisile Banda wat met haar Spaansedans solo, “Orabroy”, ‘n uitstekende 95,4% behaal het.

Daarmee is sy ook as wenner in die afdeling Junior National and Folklore Dance Solo gekroon.

Die dansgroep bestaande uit Cebisile Banda, Chantelle Oosthuizen, Jana Jacobs, Stephanie Vey en Suzenke Saayman het ‘n algehele vyfde plek verower met hul dans, Farruca in die Senior Small Group National and Folklore afdeling.

Die einste Cebisile en Stephanie Vey het ook die top tien gehaal met hul Spaansedans duet.

Georgina Jacobs sê sy is baie trots op elke danser. Almal het uitstekend gevaar en met punte bokant 82,3% klaargemaak.

Naas die Spaansedanse het die ballet en kontemporêre dansers ook uitstekend gevaar en almal onderskeidings behaal.

Die groep wat vir die wêreldkampioenskappe gekwalifiseer het was Anzel Hamman, Cebisile Banda, Chantelle Oosthuizen, Jacqueline Moolman, Jana Jacobs, Kiara Raubenheimer, Lisa Oosthuizen, Miné Fourie, Nombulelo Masike, Shané van der Walt, Suzenke Saayman en Stephanie Vey.

Die dansers het verlede jaar al hul voorgeneem om vir die kampioenskappe te kwalifiseer en het toe al ingespring en self fondse ingesamel om te kan gaan.

‘n Mens kan nie anders as om hoed af te haal vir hul toewyding, dissipline en harde werk nie.