Die Augustuswinde het hierdie jaar vroeg in die Vaaldriehoek opgedaag. Hopelik bring dit reën, maar dit het ongelukkig ook met skade gepaard gegaan. Minstens twee woonstelblokke in die omgewing van Frikkie Meyerboulevard, Vanderbijlpark, se dakke is afgeruk. ‘n Gedeelte van Harmonie Hof Woonstelle se dak het onder meer in die slag gebly. Sover Vaalweekblad kon vasstel, is niemand in die voorvalle beseer nie, maar inwoners van die woonstelblok, motoriste en ander inwoners van die omgewing het kommer op sosiale media uitgespreek omdat los sinkplate op die dak steeds ‘n ernstige gevaar inhou as dit dalk val of deur nóg winde grond toe gewaai word.

Frikkie Meyerboulevard en ander dele van die Vaaldriehoek het die afgelope jare reeds ‘n paar keer onder rukwinde deurgeloop. Die ergste was om 1982 toe rukwinde van sowat 100 kmpu ook verskeie woonstelblokke se dakke in Frikkie Meyerboulevard afgeruk het.