MEYERTON. – Die jaar het nie goed begin vir jong Chantelize van Dyk (15) van die Boltonwoldkleinhoewes nie. Sy het ‘n ernstige besering aan haar arm opgedoen nadat sy deur ‘n hings gebyt en verlede Vrydag ‘n veloorplanting aan haar regter voorarm moes kry.

Dit is voorwaar buitengewoon dat ‘n hings so aggressief opgetree het en die voorval het behoorlik opslae gemaak nadat die berig verlede week op Vaalweekblad se voorblad verskyn het.

Huisgenoot, Beeld en OFM Radio het reeds kontak gemaak om ook oor die voorval te berig. Die ekstra blootstelling word verwelkom, want die gesin behoort nie aan ‘n mediese fonds nie, en enige ondersteuning om die groeiende mediese onkoste te help dek, word verwelkom.

Behalwe dat die byt op sy eie baie pyn en lyding veroorsaak het, moes Chantelize reeds verdere pyn verduur weens die inspuitings n die wond en nou weens die veloorplanting.

“Sy is Vrydagmiddag teater toe waar die dokter twee groot stukke vel van haar regter bobeen geneem het om die wond toe te maak. Die dokter moes meer vel vat omdat die bytplekke op die buig van haar armpie is en die vel nie daar te veel gerek kan word nie,” verduidelik ma Annelize.

Hoewel die veloorplanting ‘n sukses was, het Chantelize baie gehuil na afloop van die veloorplanting. Haar arm is gespalk sodat sy hom
glad nie kan beweeg nie.

Boonop was haar hart baie seer omdat sy nie Woensdag die nuwe skooljaar saam met haar graad 10 maats kon begin nie.

“Vir nou is skool toe gaan buite die kwessie.  Die dokter sal haar gereeld ondersoek en die ja-woord gee wanneer sy mag terug hok toe,” sê Annelize.

“Die skool was ons gelukkig baie goedgesind. “Hulle gaan reël dat die onderwysers haar skoolwerk een keer per week aan my gee om haar sodoende op datum te hou.”

* Chantelize was Donderdagoggend, 28 Desember omstreeks 09:30 besig om aan ‘n heining op hul kleinhoewe te werk, toe die buurman se hings haar aan die arm gebyt het. Lees volledig berig hier: