Rugby- en netbalfees by Laerskool Handhawer
Op die rubyvelde en netbalbane het verskeie laerskoolspanne elke wedstryd met oorgawe aangedurf.
VEREENIGING. – Dit het Saterdag, 20 April doele en drieë gereën by die Laerskool Handhawer.
Daar was konstant aksie op die vyf netbalbane en rondom die twee rugbyvelde het die ondersteuners se krete wyd opgeklink.
Van die oomblik wat die verskillende skole se o.9’s hul verskyning op die baan en veld gemaak het, totdat die eerstespanne uitgedraf het, was daar hope opwinding.
Alhoewel daar telling gehou is, is daar nie amptelike wenners aangewys nie. Die Marlene Pelser gedenkdag word jaarliks aangebied en hierdie jaar het die Laerskool Eligwa, Noordskool, Handhawer, Voorwaarts, Heilbron, Republiek, Leeuwspruit, Suikerbos, Milton en Vryheidsmonument mekaar die stryd aangesê.
By die jonger rugbyspanne het die afrigters op die veld saamgedraf. Waar die jong kannetjies tekortskiet aan tegniek, het hul met al hul ywer en entoesiasme opgemaak.
Op ‘n stadium het Noordskool Primêr van Sasolburg en Laerskool Eligwa van Vanderbijlpark se o.11’s meegeding op die rugbyveld
Noordskool se stut het ieder en elk, behalwe natuurlik sy getroue ondersteuners, verras deur binne minute twee keer op volle vaart oor die doellyn te gaan kuier.
Die weer het saamgespeel en almal het die gedenkdag geniet. Dit was ‘n besondere een vir Laerskool Handhawer wat amptelik hul eeufeeswording op 24 April vanjaar vier.