VANDERBIJLPARK. – Die Van Helden-kroos is besig, talentvol en kreatief. Die drie broers, Maarten (13), Daniël (8), Johannes (6) en hul sussie, Cya (11) is almal leerlinge van die LS Emfulenipark.

Al vier sal ook eersdaags in Kunstedraai se produksie, The Sound of Music: of all times. A Pantomime by die Etienne Rousseau Teater te sien wees.

Maarten en Daniël is deel van Kunstedraai se Akademie vir Dramakuns en Cya is deel van On Pointe Ballet. Johannes neem aan een van die junior dansnommers deel.

Van die vier gaan Daniël die hele tyd op die verhoog wees as ‘n skilpad wat maar net nie aan die anderkant van die verhoog by sy oorfone kan uitkom nie.

Die Van Heldens is almal trotse Voortrekkers en deel van die Orion Kommando. By die skool is hul op hul stukke met alles van redenaars tot by gedigte uitvoerings en hul ma, Maureen sê daar word gewoonlik aan so 20 items geoefen in die huis wanneer dit tyd word vir die kunstefees.

Naas kultuur en uitvoerende kunste, is die spannetjie ook sportief. Maarten het al ‘n paar galas geswem, terwyl Cya aan hoogspring en netbal deelneem.

Daniël geniet tennis en krieket en Johannes waag sy hand op hierdie stadium aan elke sport wat vir sy ouderdom aangebied word.

Hul talente het hul van albei ouers geërf. Maureen en hul pa, Pieter was albei in hul studentedae deel van die PUK-koor en Maureen het ook klassieke sangopleiding gehad.

Pieter is ‘n violis en beide was op ‘n stadium betrokke by hul gemeente se sanggroep.

“Nou se dae het ons net bietjie besig geraak. Die kinders moet altyd êrens wees vir die een of ander uitvoering of oefening,” lag Maureen.