Ratels te taai vir die Vultures
Die Ratels en Vultures het mekaar aangevat vir die Vulturatelsbeker op Sondag, 8 September
VEREENIGING – Dit was nie die ideale weersomstandighede vir krieket nie. Daarvoor het die wind te warm gesny en was die stof te veel.
Dit het egter nie die Ratels en die Vultures krieketspanne afgeskrik om kookwater krieket te speel nie.
Op die spel was die heel eerste Vulturatelsbeker. Die Ratels is van Meyerton en die Vultures van die Vereeniging Krieketklub.
Die Ratels het besluit om eerste te kolf. ‘n Goeie besluit, want hulle het ‘n allemintige 315/9 in 50 boulbeurte aangeteken.
Die Ratels se beste kolwers was Philip Thompson 86 (88 balle), Marco van Deventer 44 (38) en Drikus Jansen van Vuuren 41 (65).
Die Vultures het nie ‘n goeie dag op die veld gehad nie en is vir ‘n skamele 59 in 12.5 boulbeurte almal uitgehaal.
Frikkie Goosen het die grootste amok onder die kolwers veroorsaak en het vyf paaltjies geneem en net 10 lopies afgestaan.
Die spanne beoog om jaarliks vir die Vulturatelsbeker mee te ding as ‘n opwarmingswedstryd.
