Oud-onnie skryf oor haar droomman
VANDERBIJLPARK - Dis nie almal wat so gelukkig is om hul droomman te vind nie. Maar Elize Davies het en gesels oor haar eie struikelblokke en triomf, asook haar nuutste liefdesroman.
Elize, ‘n voormalige onderwyseres van HTS Carel de Wet het haar droomman in Vanderbijlpark gevind.
Hulle het skaars drie maande uitgegaan voordat hulle getroud is.
“’n Droomman is iemand wat omgee en begrip het vir ’n vrou. Ek is maar outyds wat dit betref,” sê sy. Verder meen Elize ’n man moet ’n sin vir humor hê en vir sy foute kan lag.
Die held in haar boek, wat onlangs by Human & Rousseau verskyn het, het glo haar man, Leslie, se eienskappe geërf – “maar net die goeies, hoor!” skerts sy.
En net soos Carmi en Herman Hattingh, moes Elize en Leslie ook ’n paar struikelblokke oorkom.
Die eerste groot een was die taal- en kultuurverskil.
Leslie is ’n Engelsman wat in Zambië gebore is en Elize kom uit ’n stoere Afrikaner-familie.
Elize se ma het tot haar dood toe slegs Afrikaans met Leslie gepraat. “Hy moes maar vinnig leer.”
Dit het ook vasbyt gekos om aan te gaan toe Elize en Leslie se tienjarige dogter in 1994 aan kanker oorlede is.
Nóg ontwrigting het gevolg toe die egpaar en hul drie seuns besluit het om sonnige Suid-Afrika vir Engeland te verruil.
“Ses maande ná ons ingetrek het, was ons tasse gepak en ons was gereed om terug te kom,” vertel Elize. Maar hulle het deurgedruk.
Met haar aftrede kon Elize, wat deur die jare stories vir Sarie en rooi rose geskryf het en wie se eerste boek in 2006 verskyn het, haar uiteindelik voltyds op liefdesverhale toespits.
VOLLEDIGE BERIG IN VAALWEEKBLAD – 1 tot 7 November
* In ’n Droomman vir Carmi ry Carmi Molenaar, ’n eerstejaarstudent op Potchefstroom, een middag op haar fiets wanneer haar pad onverwags met dié van ouer regstudent, Herman Hattingh, kruis. Carmi se verantwoordelikhede laat egter min tyd of ruimte vir romanse. Sal die twee hardkoppige studente kan leer om mekaar te vertrou?
