Gedenkdiens op R59 ná skietery
Die gemeenskap het bymekaar gekom om die slagoffers en helpers te onthou.
MEYERTON. – Gemeenskapslede, nooddienste en sekuriteitspersoneel het Dinsdagaand by die Johan le Roux-afrit op die R59 byeengekom vir ’n gedenkdiens ter nagedagtenis aan die slagoffers van verlede week se massaskietery.
Die plaaslike sekuriteitsmaatskappy Sekuriteit Sonder Grense het foto’s van die geleentheid op hul Facebook-blad gedeel. In ’n boodskap het die maatskappy hul waardering uitgespreek teenoor alle rolspelers wat by die noodreaksie betrokke was.
“Agter die kenteken en uniform is daar mense wat dinge sien wat niemand ooit behoort te sien nie,” lui die plasing. “Ons rou saam met die families. Ons staan saam met ons kollegas. Ons bly verbind tot hierdie gemeenskap.”
Die gedenkdiens volg nadat ’n minibus-taxi op 3 Februarie deur gewapende mans aangeval is. Ses mense, onder wie vier vroue, is dood en 18 beseer. Volgens die polisie was al die slagoffers van Lesotho.
Die drie verdagtes wat in verband met die aanval in hegtenis geneem is, het Vrydag in die plaaslike landdroshof verskyn op aanklagte van moord, poging tot moord, kaping en die besit van ’n gekaapte voertuig.
Die saak is tot ’n latere datum uitgestel terwyl die ondersoek voortduur.
