Dit was verlede week weer die geval tydens ’n ontstellende reddingspoging in Sebokeng.

Wat begin het as ’n reaksie op ’n oproep oor ’n weerlose blou-apie in die nedersetting, het vinnig in absolute chaos ontaard.

Gemeenskapslede het die dier met klippe bestook, terwyl een individu selfs met ’n windbuks op die apie geskiet het. Benewens die fisiese aanvalle, is klappers in die rigting van die getraumatiseerde apie gegooi.

DBV-inspekteurs het ure lank onverpoos gewerk om die apie teen verdere mishandeling te beskerm. Die situasie het egter lewensgevaarlik geëskaleer toe die skare teen die inspekteurs gedraai en DBV-voertuie met klippe bestook het.

Die polisie (SAPD Sebokeng) moes dringend ontbied word om skarebeheer toe te pas en die orde te herstel.

Teen die tyd dat die polisie opgedaag het, het die skuldiges wat op die apie geskiet en klappers in sy rigting gegooi het, reeds in die skare verdwyn.

Die bang apie het uiteindelik skuiling in die dak van ’n motorhuis op ’n nabygeleë erf gesoek, waar hy veilig gevang kon word nadat die SAPD die erf beveilig het.

Hy is onmiddellik na die Drie Riviere-dierekliniek geneem waar hy vir geringe beserings behandel is. Die apie sal nou by die Johannesburg Wildlife Veterinary Hospital rehabiliteer word voordat hy in die wildernis vrygelaat word.

Die organisasie beklemtoon dat hulle geen steen onaangeroerd sal laat om die skuldiges te identifiseer en aan te kla nie.

’n Beloning van R1 000 word aangebied vir inligting wat tot die suksesvolle arrestasie en vervolging van die verdagtes lei.