VAALPARK – Hoogtevrees is nie jou speelmaat nie! Vra maar vir enigeen wat aan akrofobie ly. Dit is glad nie pret nie. Daarvan kan Nicol Kriel, hoof van Vaalpark Primêre Skool, getuig.

Hy is as deel van die skool se jaarlikse ouer en onderwyserbraai op 11 Februarie met ‘n Cherry Picker meer as 20m in die lug opgeneem om fondse in te samel vir die skool.

Vir die gelukkige sterflinge wat nie ‘n vrees vir hoogtes het nie, klink dit miskien na kinderspeletjies. Maar dit was beslis nie die geval vir mnr. Kriel nie.

Hoewel hy ‘n bok vir sports en dit met ‘n breë glimlag op die kennebak gevat het, het hy stilweg gebieg: “Daar’s niks hiervan wat ek geniet nie. Ek hou nie van hoogtes nie.”

Al het Eazy Access hom met ‘n stewige veiligheidsharnas beveilig, het hy maar stilgesit en homself op sy selfoon besig gehou.

Darem het sy brawe opoffering borgskappe ter waarde van R30 000 vir die skool ingebring.

Die skool se leerlingraad het ook tussen die honderde braaimeesters en bywoners rondgeloop om fondse in te samel. Dit was reuse pret!