SASOLBURG – Dienslewering by die voertuigregistrasiekantoor het onlangs tot ‘n stilstand gekom toe die elektrisiteit afgeskakel is weens agterstallige betalings wat die Vrystaatse Departement van Openbare Werke en Infrastruktuur na bewering aan die Metsimaholo Plaaslike Munisipaliteit verskuldig is.

Dit het natuurlik tot groot frustrasie onder lede van die publiek gelei.

“Terwyl munisipaliteite verplig is om hul kredietbeheerbeleid toe te pas, is dit ewe belangrik dat staatsdepartemente hul finansiële verpligtinge nakom om die kontinuïteit van openbare dienste te verseker,” sê Jafta Mokoena (DA-woordvoerder oor Openbare Werke en Infrastruktuur in die Vrystaatse Wetgewer).

Hierdie elektrisiteitsonderbreking het dienste aan inwoners ontwrig.

Dit het veral probleme veroorsaak vir inwoners wat nuutgekoopte voertuie moet registreer en aan wetlike vereistes moet voldoen.

“Die DA eis dat die betrokke owerhede duidelikheid verskaf oor die omstandighede wat tot hierdie situasie gelei het en vinnige stappe doen om normale bedrywighede te herstel.

“Om aanspreeklikheid te verseker en soortgelyke voorvalle in die toekoms te voorkom, moet ‘n prioriteit bly. Inwoners verdien ‘n regering wat sy verantwoordelikhede doeltreffend bestuur en ononderbroke dienslewering beskerm,” het Mokoena afgesluit.