VANDERBIJLPARK – Verlede Donderdag het Kunstedraai hul eerste poësie-oggend gehou. Van 11:00 tot 13:00 is daar onder die groot koelteboom gedigte voorgelees, gekuier en gesels.

Franciska van der Merwe sê die gedigte wat voorgelees is het alles ingesluit van die ou digters tot by die nuwerwetse gedigte.

Van die mense het ook hul eie gedigte voorgelees. Madelein Coetzee se gedig, Weesouer, het tot elkeen gespreek.

Dit vang die situasie vas van soveel ouer mense wie se kinders en kleinkinders in ander lande bly en hulle “wees” gelaat het.

Elke gedig het ʼn gesprek ontlont en vele stories is so gedeel. Sy sê hulle hoop om in die toekoms meer sulke dae en ook aande aan te bied.

Toegang is gratis. Indien jy ʼn uitnodiging na die volgende digkuns geleentheid wil ontvang, kontak Franciska op 082 781 8032.