Is jy en woef gereed vir Saterdag?
Honde-eienaars word herhinner aan hierdie naweek se pret saam met hul viervoet-kinders ter ondersteuning van 50 Shades of Spay.
MEYERTON – Yvette Wilde van 50 Shades of Spay bied Saterdag (28 Februarie) die geleentheid aan by die Meyerton Sport- en Ontspanningsklub.
Toegang is slegs R20 per persoon en R20 per hond.
“Dit is ’n laatmiddag-stappie wat spesiaal beplan is om die honde-ouers en hul woefkinderss koel te hou. Daar is ’n keuse tussen ’n 2,5 km- of ’n 5 km-stappie, wat om 17:30 sal begin,” verduidelik Yvette.
Veilige roete
Die roete is veilig en is binne die Meyerton-sportgronde, met verskeie waterpunte langs die pad.
Neem asseblief kennis dat alle honde aan ’n leiband moet wees.
Die hekke open reeds om 16:00 en daar sal ook vermaak wees. Carla, ’n plaaslike sanger en liedjieskrywer, sal optree en ’n paar klein kompetisies sal voor en na die stappery plaasvind.
Daar sal selfs ’n spesiale “honde-spyskaart” beskikbaar wees.
Speelarea vir kinders
“Die venue is uitstaande, en daar is kroeg- en restaurantfasiliteite vir die mense, asook ’n speelarea vir kinders sodat almal so lank as wat hulle wil kan kuier,” sê Yvette.
“Sluit asseblief by ons aan terwyl ons die laaste dag van Februarie in Valentynstyl vier ten bate van die 50 Shades of Spay se veeartsrekening.”
Indien jy ’n ekstra bydrae wil maak, sal ’n sak honde- of katkos opreg waardeer word. Dit sal geskenk word aan die diere wat deur 50 Shades of Spay se maandelikse uitreikprojekte ondersteun word.
