Vooruitgang in die Vaal: Sê hallo vir Sibi die Sweeper
Die twee nuwe projekte is ’n kragtige voorbeeld van hoe vennootskappe positiewe verandering binne plaaslike gemeenskappe kan teweegbring.
VEREENIGING – Dit was die afgelope Woensdag nie maar net nog ‘n Woensdag in die Vaal nie. Dit was ‘n groot tree in die regte rigting om veiligheid in Sedibeng te bevorder en vir die eerste keer spog die stad met ‘n futuristiese-padveër genaamd Sibi.
Die bekendstelling van ’n nuwe gemeenskapsinisiatief tussen Eskom se Lethabo-kragstasie en die Vaal Business Cooperation (VBC) het ’n belangrike mylpaal vir veiligheid en omgewingsorg in die Vaal-streek verteenwoordig.
Die geleentheid het by die Riviera Hotel in Vereeniging plaasgevind, waar gemeenskapsleiers, plaaslike besighede en wetstoepassers vergader het om die amptelike onthulling van die vennootskap by te woon.
Deur die Eskom Ontwikkelingstigting het Eskom Lethabo-kragstasie R5,2m geskenk om projekte te ondersteun wat daarop gemik is om ’n veiliger en skoner omgewing vir inwoners in die Vaal te skep.
Die befondsing vorm deel van Eskom se breër verbintenis tot gemeenskapsontwikkeling en volhoubare vennootskappe met plaaslike belanghebbendes.
Belangrike projekte
Projek Open Eyes:
’n Gemeenskapsveiligheidsprojek wat ontwerp is om misdaadvoorkomingspogings in die streek te versterk. As deel van die program is 15 outomatiese nommerplaat-herkenningskameras (ANPR) aangekoop en strategies in verskeie Vaal-gemeenskappe geïnstalleer.
Hierdie kameras sal wetstoepassingsagentskappe help deur die monitering van voertuie te verbeter en misdaad te help bekamp.
Sibi the Sweeper:
Benewens die bevordering van veiligheid, fokus die vennootskap ook op die netheid van plaaslike woonbuurte. ’n Straatveër-masjien, wat liefdevol “Sibi the Sweeper” gedoop is, is geskenk om die Vereeniging-gemeenskap te help om strate en openbare ruimtes skoon te hou.
Samewerking vir verandering
Die inisiatief het sterk steun ontvang van die SAPD, die plaaslike munisipaliteit en verskeie besighede regoor die Vaal, wat die samewerkende gees agter die projek beklemtoon.
Die bekendstellingsgeleentheid is afgesluit met ’n simboliese lintknipseremonie onder leiding van die burgemeester en die algemene bestuurder van Eskom se Lethabo-kragstasie.
