VANDERBIJLPARK – Dié unieke geleentheid vind van 16 tot 20 Maart aan boord van die luukse MSC Opera-passasierskip plaas.

Ná ’n streng kwalifiseringsproses het hierdie dansers bewys dat hulle onder die land se mees belowende jong kunstenaars tel.

Hulle sal in beide solo- en groepkategorieë teen internasionale mededingers te staan kom.

Die span bestaan uit:

Mia Jansen van Nieuwenhuizen, Eloise Human, Denise Lubbe, Serena Nobre, Layla Wallace, Erin Mopp, Zoe van Tonder, Joche van Zyl, Zante Visser en Chloe Molyneaux.

Die droom om op ’n internasionale platform op te tree, is moontlik gemaak deur ondersteuning van die Gautengse Departement van Sport, Kuns en Kultuur.

Hierdie borgskap dek noodsaaklike uitgawes soos kompetisiefooie, verblyf, vervoer en kostuums, wat die finansiële druk op gesinne verlig.

Die dansers en hul families is dankbaar teenoor die departement om die unieke ervaring te kan geniet.

Dit is verstaanbaar dat Leandi Goosen, eienaar van Just Dance Studio, bars van trots oor haar studente.

“Ons dansers het ongelooflik hard gewerk om hierdie vlak te bereik. Ons is opreg dankbaar vir die departement se ondersteuning en die aanmoediging vanuit ons gemeenskap. By Just Dance Studio glo ons dat groot dinge moontlik is met geloof, dissipline en passie.”

Die studio, wat tans 60 studente tussen die ouderdomme van 3 en 25 jaar afrig, fokus op ’n wye reeks style insluitend Lyrical, Jazz en Kontemporêre dans.

Volgens Goosen gaan die afrigting oor meer as net tegniek; dit gaan oor karakterbou, selfvertroue en sterk waardes.