VANDERBIJLPARK – Laerskool D.F Malherbe is met reg trots op hul hoofdogter van 2022. Daniella Grobbelaar of dan Bobo soos almal haar in die laerskool geken het, is onlangs aangewys as die gesamentlike  beste doelskieter van die St. Mary’s toernooi.

Sy was deel van die C & N Sekondêre skool Oranje in Bloemfontein se eerste hokkiespan wat 2 – 0 in die eindstryd geseëvier het. Bobo, wat eers ‘n leerder aan die Hoërskool Garsfontein was, is tans ‘n trotse Oranjeniet, nadat sy in 2026, na Bloemfontein verhuis het. 

Sy geniet haar hokkie onder leiding van die bekende afrigter, Morné Odendaal, wie se sukses op en van die veld af, boekdele spreek.

D.F Malherbe het op hul facebookblad gesê: “Ons het destyds al geweet dat sy nog groot dinge gaan bereik, toe sy al op laerskool, as lid van die Suid-Gauteng 0/13-hokkiespan verkies is en daarna vir drie jaar lank, Noord-Gauteng verteenwoordig het. In 2025 verwerf sy dan ook haar SA-kleure vir binnemuurse hokkie 🇿🇦.

“Bobo, DF is ongelooflik trots op jou suksesvolle hokkieloopbaan, uitsonderlike prestasies en die nederige persoon wat jy nog altyd is en bly. Dankie vir die voetspore wat jy nalaat.”