Jannie du Toit bring Brel na die ERT
Ontdek weer die geniale musiek van Brel met Jannie du Toit se briljante vertolkings by die ERT
SASOLBURG. – Bekende Afrikaanse sanger, Jannie du Toit tree Saterdag, 11 Mei op in die Etienne Rousseau Teater (ERT) om 15:00.
In Bonjour Monsieur Brel word Jacques Brel se beeldryke tekste in vier tale gesing deur Jannie du Toit en begelei deur ’n musiekensemble van klavier, tjello en kitaar.
Jannie is dekades reeds ’n hoogaangeskrewe Brel-vertolker en ’n standhoudende eksponent van uitnemendheid in liedkuns, onder andere in Nederlands.
Veral twee Nederlandse Brel-liedere – Madeleine en Liefde van later – vestig hom vroeg in die negentigerjare as Brel-vertolker. Brel se geniale beeldende skryfwerk kom in die vertoning na vore en is soos alle groot kuns, tydloos.
Kaartjies is beskikbaar by www.ertickets.com teen R200 pp en R180 pp vir persone ouer as 60 jaar.
