*Die storie het eerste in die gedrukte weergawe van Vaalweekblad verskyn. Kry ons gedrukte koerant op Vrydae vir al die jongste nuus.

MEYERTON. – Die landloopseisoen is nou in volle swang en die tweede byeenkoms van Atletiek Vaaldriehoek (AVT) se 2024-landloopliga het die naweek naelbyt-landloopaksie by die Hoërskool Dr. Malan opgelewer.

Atlete wat gedink het dat die Hoërskool Dr. Malan se skoolterrein “plat” is, was in vir ‘n groot verrassing toe hulle met die drie bulte agter in die skoolterrein se suid-westelike hoek kennis gemaak het.

Die res van die roete was egter plat en vinnig.

Daar was by dié byeenkoms in Meyerton heelwat meer grasstroke as die klip- en grondagtige terrein wat atlete vroeër vandeesmaand by die eerste ligabyeenkoms by die Silver Oaks Montessori-skool in Heidelberg begroet het.

Die volgende ligabyeenkoms vind op 8 Junie by die George Thabe-stadion in Sharpeville plaas en word deur die Lekoa-atletiekklub aangebied.

Die res van die datums is as volg: 6 Julie Boswell Wilkie Circus (Meyerton Atletiekklub); 20 Julie: TBA (Future Champs AC): 3 Augustus: Laerskool Kollegepark (Nedbank AC) en 10 Augustus: TBA: AVT Champioenships (Dimathi).