MEYERTON – Die Meyerton Knights Rugbyklub het hul plek in die plaatafdeling se finaal van die President’s Cup verseker ná ’n opwindende dubbele oorwinning teen die Elsburg Eagles op hul tuisveld verlede naweek.

In ’n spanningsvolle halfeindstryd het beide die Knights se eerste- en tweedespan uitmuntende vertonings gelewer om hul plek in die eindstryd te bespreek.

Die tweedespan het ‘n vasberade Eaglesspan naelskraaps met 22-19 geklop in ‘n boeiende wedstryd wat om 14:40 begin het.

Die eerstespan het om 16:00 op dié momentum voortgebou en ’n oortuigende 30-10 sege teenoor die besoekers behaal.

Met rotsvaste verdediging en kragtige spel van die voorspelers het die Knights vroeg beheer geneem en dit nie prysgegee nie – tot groot vreugde van die tuisskare.

Die Knights kyk nou vorentoe na die eindstryd teen Benoni, wat beloof om ’n kragmeting van formaat te wees.

Selfvertroue bruis in die kamp, met albei spanne gereed om die plaatafdeling met silwerware af te sluit.