MIDVAAL – ’n Bevestigde uitbreking van bek-en-klouseer is aangemeld in beeste wat in gemeenskaplike weiding naby die R550 en die Synag-melkery in die Witkop-gebied wei.
Die staat veearts, dr. D. Mpofu, het in ’n amptelike verklaring bevestig dat die virus in diere aan die Oos-Rand en ook aan die Midvaal-kant van die R550 aangetref is.
Volgens Patricia Hutcheson, lid van die Midvaal se burgemeesterskomitee vir finansiële dienste, is daar twee bevestigde gevalle aan die Midvaal-kant, terwyl die groter uitbraak aan die Ekurhuleni-kant is.
As voorsorgmaatreël is gedeeltes van Witkopweg vir verkeer gesluit.
Die departement van landbou en landelike ontwikkeling waarsku dat die bek-en-klouseer-virus hoogs aansteeklik is en hoofsaaklik versprei deur die beweging van besmette kloudiere, asook deur besmette voertuie en mense.
Beheermaatreëls sluit die beperking van beweging van vee, mense en verkeer deur hoërisiko-gebiede in.
Die publiek, veral plaaswerkers en vee-eienaars, word gemaan om streng biosekuriteitsmaatreëls te volg.
Die Wet op Dieresiektes vereis dat grondeienaars en diere-eienaars alle redelike stappe moet doen om die verspreiding van siektes te voorkom, dit aan die direkteur aan te meld en aan enige voorskrifte of direktiewe te voldoen. Versuim om dit te doen, is ’n oortreding.
Die departement het reeds begin met entstofverkryging ter waarde van R72 miljoen, en verdere verspreiding sal dopgehou word.
Intussen word inwoners versoek om nie met vee in die betrokke gebiede te werk of te reis nie, tensy dit absoluut noodsaaklik is.
