VEREENIGING – Bykans vier dekades nadat Tony Knight, geliefde Afrikaanse countrysanger, en sy eerste vrou Debbie, van mekaar geskei het, het hulle weer mekaar gevind.

Dit klink soos soos iets uit ’n lied… en dit was.

Die country sanger, gebore en getoeë in Vereeniging, en sy Debbie is in 1979 getroud, maar hul huwelik het in 1988 op die rotse geloop.

Kort daarna het Tony die hartroerende lied Soos Net Jy Kan Verstaan geskryf – geïnspireer deur die seer van hul skeiding.

Die lied het sy loopbaan gevorm, maar hy het nooit geweet dat dit ook sy lewe sou verander nie.

In Januarie 2023, ná 37 jaar, het Debbie hom onverwags gekontak.

Hulle het by ’n Spur ontmoet – die eerste keer van aangesig tot aangesig in bykans vier dekades.

“Sy het vir my dankie gesê vir die twee pragtige kinders (Jacques en Chantal) wat ek haar gegee het,” onthou Tony van die ontmoeting.

Net twee maande later is hul seun Jacques (41) tragies in ‘n fratsongeluk oorlede. Hy het van die trappe by sy dubbelverdiepingwoning af geval.

Daardie verlies het hulle saamgebring, en die liefde het weer vlamgevat.

“Toe ek haar sien, het al die woede verdwyn. Net liefde het oorgebly,” vertel Tony.

“As iemand my daardie dag in 1988 gesê het ons sou weer saam wees, sou ek hulle nie geglo het nie.”

Debbie speel nou die hoofrol in die musiekvideo van Soos Net Jy Kan Verstaan – die lied wat hy destyds vir háár geskryf het.

Al is hulle nie weer getroud nie, leef hulle nou saam as lewensmaats. ’n Tweede kans wat min mense kry.

Tony (69) het pas ’n nuwe platemaatskappy-kontrak geteken en beplan nóg musiekvideo’s, insluitend een in Muizenberg, waar hy en Debbie destyds wittebrood gevier het.

“Ware liefde sterf nie,” sê hy. “Soms vlieg die duif weg… maar as dit ware liefde is, kom sy terug.”