Die rugbyveiligheidsprogram van Suid- Afrika, BokSmart, het ‘n magiese mylpaal bereik met die sertifisering van sy 200 000ste deelnemer Lee– Handré Ferreira, ‘n afrigter van Vanderbijlpark.

Ferreira het met die aanlynkursus begin wat afrigters en skeidsregters oplei in die nuutste wetenskaplike tegnieke om die veiligheid van spelers
te verbeter. ‘n BokSmart-sertifisering is ‘n vereiste vir enigiemand wat in Suid- Afrika rugby wil afrig of skeidsregter
speel.

BokSmart het hom oor die jare gevestig as een van die voorste veiligheidsprogramme in wêreldrugby. Alfred Ross, BokSmart-administrateur
by die Valke-rugbyunie, het Ferreira gelukgewens met die prestasie om die 200 000ste persoon te word wat die sertifisering voltooi het.

Dr. Wayne Viljoen, SA Rugby se senior bestuurder vir rugbyveiligheid, het gesê: “BokSmart-kursusse word al 16 jaar aangebied en oor die jare sien ons ‘n groot verskil in hoe rugbyveiligheid benader word.

Ons is reeds by die agtste herhaling van die program, en terwyl dit ontwikkel, is dit baie belangrik dat afrigters en skeidsregters aan BokSmart-gehoorsaam bly.

Alhoewel dit nog nie verpligtend is vir ander rolspelers nie, moedig ons mediese ondersteuningspersoneel, spanbestuurders en selfs spelers aan om die kursus te doen, sodat almal dieselfde ‘BokSmart’-taal op wedstryddae praat,” het hy bygevoeg.

Dr. Viljoen het die 29-jarige Ferreira, wat op laerskoolvlak afrig waar sy seun speel, spesiaal gelukgewens. Ferreira het ‘n geskenkpak van SA Rugby en die Players’ Fund ontvang, asook ‘n persoonlik geraamde sertifikaat.

“BokSmart is ‘n uitstekende manier om afrigters, klubs, skole en skeidsregters aanspreeklik te hou vir hoe hulle spelersveiligheid benader. Ek kon my leerstellings en vorige ervaring die jaar by my span toepas,” het Ferreira gesê.

“Ek dink die BokSmart-program bring baie waarde en dit sal wonderlik wees as klubs en skole nooddienspersoneel gebruik wat ook met die program vertroud is, veral privaat persone wat by wedstryde help. Om eerlik te wees, hierdie erkenning het regtig die vlam in my weer aangesteek om my afrigting uit te brei en dalk selfs weer as skeidsregter betrokke te raak.”

BokSmart, ‘n gesamentlike inisiatief tussen SA Rugby en die Chris Burger Petro Jackson Players’ Fund, is formeel in Julie 2009 bekendgestel. Sedertdien het die voorkoms van permanente katastrofiese akute rugmurgbeserings in Suid-Afrikaanse rugby met ongeveer 48% afgeneem, wat beteken dat sowat 32 mense oor ‘n 10-jaar periode van sulke beserings gespaar is.

Die rugbyveiligheidsafdeling van SA Rugby versamel voortdurend data en pas die sertifiseringsprogram aan by veranderende tendense.
Dr. Viljoen het beklemtoon: “Alhoewel Lee–Handré een van meer as 200 000 mense is wat BokSmartkursusse oor die jare bygewoon het, is dit belangrik dat ons aan die voorpunt  van rugbyveiligheid bly, sodat ons ‘n veiliger en meer genotvolle omgewing vir almal kan verseker, veral die spelers.”

Volgens Annie Dobson, uitvoerende hoof van die Players’ Fund, is dit ‘n kragtige herinnering aan wat bereik kan word deur gedeelde toewyding
aan spelersveiligheid.

“Elke afrigter, skeidsregter en ondersteuner wat BokSmart-gesertifiseer raak, help om ‘n veiliger spel vir almal te skep.
Ons prys Lee–Handré en al diegene wat voortgaan om spelerswelstand op beide voetsoolvlak en professionele vlak te bevorder.

Die impak van BokSmart is tasbaar, en hierdie mylpaal dien as ‘n viering én oproep tot aksie: laat ons steeds druk toepas om veiligheid die kern te hou in die spel wat ons almal liefhet,” sluit sy af.