Knights oorrompel VUT met 77-0 sege
Die Knights het geen genade getoon nie – en VUT met ’n 77-0 slagting van die veld gevee.
VANDERBIJLPARK – Die Meyerton Knights se eerstespan het verlede naweek hul indrukwekkende onoorwonne rekord in vanjaar se Valke Rugby Merlin Liga voortgesit met ’n oortuigende 77-0 oorwinning teen die Vaal Universiteit van Tegnologie (VUT) op Saterdag, 2 Augustus.
Hoewel die wedstryd nie by hul tuisveld, die Meyerton Sports Club, plaasgevind het nie, het die Isak Steyl Stadion in Vanderbijlpark – steeds binne die Vaaldriehoek – soos ’n tuiswedstryd gevoel, veral na al die wegwedstryde wat oor die afgelope paar weke gespeel is.
Die Knights het hul stempel afgedruk met ’n oorheersende vertoning wat die studente geen ruimte gegee het nie.
Met dié oorwinning bly die Knights bo-aan die punteleer in die 2025 Valke Rugby Merlin Liga, en hul onoorwonne status bly ongeskonde.
Die tweedespan het ook hul wedstryd gemaklik gewen met 39-5 en behou daarmee hul plek aan die spits van die liga.
Beide spanne wys deurgaans hul karakter, vaardigheid en samehorigheid – ’n bewys van goeie afrigting en spanbestuur.
