MIDVAAL – Morné Mommsen, opleidingsbeampte by Midvaal-brandweer, is een van slegs twee Suid-Afrikaners wat gekies is om deel te wees van die Suidelike Afrikaanse Ontwikkelingsgemeenskap (SADC) Noodreaksie-span (ERT). Sy nominasie deur die munisipaliteit is formeel goedgekeur deur die Nasionale Rampbestuursentrum (NDMC).

Mommsen sal dien in die Soek- en Reddingsafdeling van die ERT en bring meer as 34 jaar ervaring in Nooddienste na die span. Hy het internasionale ontplooiings as soek- en reddingspesialis onderneem en is die skrywer van Suid-Afrika se eerste Honde Soek- en Reddingshandboek. Hy het ook as kundige by die QCTO-kurrikulumontwikkelingsplatform gedien en sy navorsing by nasionale en internasionale konferensies aangebied.

Sy kwalifikasies sluit rampbestuur, tegniese redding, brandbestryding, noodmediese reaksie en K9-soekoperasies in. Mommsen volg tans sy meestersgraad in Omgewingswetenskap met ‘n fokus op rampbestuur.

Hy sal die SADC ERT-induksieopleiding bywoon van 25 Augustus tot 5 September 2025 in Nyanga-provinsie, Zimbabwe. Na voltooiing sal hy formeel ingesweer word en beskikbaar wees vir ontplooiings in enige SADC-lidstaat tydens rampspoed.

Raadslid Chantal Gomes, lid van die Burgemeesterskomitee vir Publieke Veiligheid, het Mommsen geluk gewen en gesê: “Sy seleksie is die direkte gevolg van dekades van toegewyde diens, tegniese kundigheid en leierskap in lewensreddende operasies. Ons is uiters trots op hom en vertrou dat hy Midvaal en Suid-Afrika met onderskeiding sal verteenwoordig.”

Midvaal het in ‘n verklaring Mommsen voorspoed toegewens met sy opleiding en toekomstige ontplooiings.