VANDERBIJLPARK – Die Vaal Kings is die Suid-Afrikaanse Amerikaanse Voetbalkampioen nadat hulle 24 Augustus op die HS Driehoek se velde die Harlequins met 46-0 in die eindstryd vermorsel het.
Die Vaaldriehoek se ander span, die Knights, het die Commandos in die halfeindronde oortuigend met 36-0 geklop om sy plek in die eindstryd te verseker sonder dat ‘n enkele punt afgestaan is.
In die ander halfeindstryd het Harlequins vir die Knights met 14-12 geklop om tot die eindstryd deur te dring.
Daar word gewoonlik ‘n genade-reël in die poelwedstryde en halfeindstryde toegepas om die wedstryd vroeg te beëindig sodra ‘n span met meer as 30 punte voorloop. Hierdie genadedood was nie in die eindstryd vir die Quins beskore nie.
Hulle moes maar pakslae soos ‘n man vat. Grid Iron in Suid-Afrika is beslis in sy babaskoene en die sterk ondertoon van ons rugby-DNA is baie sigbaar. Die manne dons mekaar op. Iets wat baie natuurlik vir ons Suid-Afrikaners is.
Hoe vinnig die sport gaan groei? Dit kan mens nie met sekerheid sê nie, maar dat die fisiekheid ons boerseuns soos ‘n handskoen pas, is nie altemit nie. Dit is beslis hier om te bly.
