MEYERTON — ’n Afleweraar van die Fishaways-visrestaurant in Meyerton is Vrydagaand ernstig beseer in ’n botsing op Jim Fouché-weg waarin twee ligte motorvoertuie en ’n afleweringsmotorfiets betrokke was.

Die ongeluk het op 17 Oktober 2025 plaasgevind. Die pad is vir ’n tyd lank gesluit terwyl nood- en reddingsdienste werk op die toneel verrig het.

Volgens inligting wat intussen bevestig is, was die beseerde ’n afleweringsbestuurder van Fishaways besig om ’n bestelling op die Boltonwold-kleinhoewes af te lewer toe die ongeluk plaasgevind het.

Hy is met veelvuldige beserings in ’n kritieke toestand na ’n hospitaal vervoer vir dringende mediese behandeling.

Diensverskaffers wat op die toneel gereageer het, sluit onder meer Midvaal-brandweer, Midvaal-verkeer en ER24 in. Die pad is later weer vir verkeer heropen.

Kliënte van Fishaways in Meyerton het vroeër die aand onverklaarde afleweringsvertragings ervaar. Ten minste een kliënt het sy formele klagte daarna teruggetrek toe dit bekend geword het dat die afleweringsbestuurder in die ongeluk betrokke was.

Die oorsaak van die botsing is nog nie bevestig nie en ’n ondersoek is aan die gang.