VANDERBIJLPARK – Die eerste dag van die Sedibeng Premierliga (SPL) wat Saterdag 25 Oktober op die HS Transvalia se plaasgevind het, het spogkrieket opgelewer.

Die gesogte toernooi vir o11 -en o13-krieketspanne het die afgelope 11 jaar diep spore in die Vaaldriehoek getrap.

In die eerste kragmeting vanjaar se toernooi het die Strikers se o11’s die Boundary Warriors met 8 paaltjies geklop. Die Speler van die Wedstryd was Luan van Vuuren wat 50* (39) lopies van sy wilgerlat laat vloei het.

Wina Botha van die Casa Ravens se o11’s (4/8) het maalvleis van die Jaguars se kolflys gemaak en gesorg dat sy span die met 80 lopies seëvier. Die Jaguars is vir ‘n beskeie 61/10 uitgeboul.

In die o13-afdeling het Casa Roosters en Jaguars in klipharde stryd gewys dat hulle aanspraakmakers op die titel gaan wees.  Roosters het 148/4 in die toegelate 20 beurte ‘n goeie teiken daargestel.

Die Warrelwind kolfbeurte deur Keagan van Aswegen 52* van slegs 34 aflewerings en Duhan van der Berg 49 (36) het egter korte mette van die teiken gemaak met die Jaguars wat uiteindelik met 8 paaltjies gewen het.