MEYERTON – Die Hoërskool Dr. Malan het Dinsdagaand, 3 Februarie, die amptelike opening van sy splinternuwe netbalklubhuis gevier – ’n mylpaal wat net betyds kom voor die aanvang van die skool se gewilde netbal-aandreeks wat vanaand =afskop.

Die inhuldiging is bygewoon deur die skoolhoof, mnr. Rossie Briers, die voorsitter van die beheerliggaam, mnr. Pieter Walters, asook die netbaldirekteur, Nadia Pienaar, saam met borge, ouers en lede van die gemeenskap.

Die aandreeks duur van 5 tot 25 Februarie.

Volgens Pienaar is die klubhuis veel meer as net ’n sportfasiliteit. “Dit is ’n tuiste vir elke speler – ’n plek van veiligheid, huislikheid en ondersteuning waar drome gevorm en geloof gebou word,” het sy tydens haar toespraak gesê.

Die woorde “God is still writing your story”, wat teen die muur pryk, vergestalt volgens haar die gees en doel van die projek.

Teen die mure van die klubhuis is foto’s van twee van Hoërskool Dr. Malan se mees ikoniese oud-leerders, naamlik voormalige Protea-netbalspeler Nadia Uys-Pienaar en wêreldbekende Irene van Dyk.

Albei het op nasionale en internasionale vlak groot hoogtes bereik en dien as inspirasie vir huidige en toekomstige spelers.

Mnr. Briers het gesê die klubhuis bied ’n noodsaaklike heenkome vir leerders. “In Meyerton is so ’n plek uniek. Dit gee kinders ’n veilige ruimte ná skool – nie net vir sport nie, maar ook vir groei as mens,” het hy gesê.

Dit is ’n tuiste vir elke speler – ’n plek van veiligheid, huislikheid en ondersteuning waar drome gevorm en geloof gebou word.

Die projek is moontlik gemaak deur die ondersteuning van verskeie plaaslike borge, terwyl verversings tydens die opening deur Elaine Pienaar verskaf is.

Met topgehalte fasiliteite, massadeelname en uitstekende afrigting bevestig Hoërskool Dr. Malan sy posisie as ’n krag in skoolnetbal.