VANDERBIJLPARK – Die Centurions Vaal Motorfietsklub in Shakespearestraat het op Saterdag, 4 April, sy jaarlikse Riddle Bunny Run gehou.

’n Dag waar brullende enjins en paashaasvreugde mekaar omhels het.

Oud en jonk het dit gate uit geniet terwyl motorfietse deur die straat gedreun het.

Paaseiers is oral tussen die pret weggesteek en die opgewonde soekery het die kinders laat skaterlag.

DJ Ben het die atmosfeer verder met lekker treffers aangeblaas, terwyl kosstalletjies iets vir die keel en die maag gebied het.

’n Hoogtepunt was die aanwysing van die bes geklede paashaas en die wenner van die inkleurwedstryd.

Elke bywoner is bederf met ’n spesiale metaalplaatjie in die vorm van ’n paaseier – ’n perfekte aandenking.

Vir die dapperstes was daar selfs die geleentheid om ’n tatoeëermerk te kry. In ‘n neutedop was dit ’n dag vol aksie, lag en Paaspret.