VANDERBIJLPARK – Die haan wat op die kerktoring staan, gaan vanaand en môreaand ʼn buurman op die kerk se dak hê.
Die buurman se naam is, Ds. JC Els van die NG Kerk se Suikerbos gemeente in Drie Riviere-Oos, wat sy ooreenkoms met sy gemeente moet nakom. ʼn Belofte maak skuld en hy is ʼn man van sy woord.
Ds. JC het sy gemeente uitgedaag dat indien hul jaarlikse 10de maandprojek se doelwit bereik hy een aand op die kerk se dak sal slaap en as hulle dit met R40 000 oortref hy ʼn bykomende aand op die dak sal deurbring.
Raai wie het vir hom twee aandjies by 1 Dabchick straat bespreek? Hoewel hy vanaand eers omstreeks 19:00 van Catherine Robson se gholfdag sal terugkeer, het die gemeente solank sy akkommodasie in die vorm van ʼn tent op die dak vir hom gereed gekry.
Sy dakslapery vorm lekker deel van die kerk se kampnaweek.
