MEYERTON – Emile de Witt, wat tans in polisieaanhouding is in verband met die beweerde diefstal van meubels uit ’n Bryanston-woning, staar nou ook ’n bykomende klag van motordiefstal in die gesig.

Dit het aan die lig gekom tydens sy jongste verskyning in die Randburg-landdroshof, waar die saak weer uitgestel is tot 23 April vir ’n aansoek om regshulp.

De Witt, wie se naam oor die afgelope paar jaar herhaaldelik verbind is met verskeie bedrog- en eiendomverwante sake in die Vaaldriehoek, is in Maart in Sandton in hegtenis geneem nadat hy glo meubels uit ’n Bryanston-eiendom verwyder het ondanks ’n uitsettingsbevel.

Volgens privaatondersoeker Morney Vos van Specialised Security Services (SSS), wat saam met Mike Bolhuis werk, staan De Witt nou ook tereg op ’n bykomende klag van beweerde motordiefstal in ’n Sandton-saak. Die saak sal saam met die bestaande klagte op 23 April voor die hof dien.

Vos sê De Witt het tydens sy verskyning om regshulp aansoek gedoen omdat hy nie ’n prokureur kan bekostig nie, en sal in aanhouding bly tot sy volgende verskyning.

Die ontwikkeling volg op vorige hofverskynings vroeër die maand, toe De Witt reeds gewaarsku is om regsverteenwoordiging te bekom of sy eie borgaansoek te hanteer.

Kort ná sy aanvanklike inhegtenisneming in Maart het Bolhuis se Specialised Security Services verklaar dat die saak verband hou met die beweerde onwettige besetting van die Bryanston-eiendom en die verwydering van meubels terwyl hy onder ’n hofbevel vir uitsetting was.

In vroeëre SSS-ondersoeke word De Witt verbind met verskeie beweerde sake van bedrog, wanvoorstelling en eiendomsverwante misdrywe, met klagtes wat volgens die organisasie reeds sedert 2019 in verskillende polisiedossiere verskyn.

Die saak is uitgestel tot 23 April 2026 vir verdere verskynings.