Die nuus oor die gewilde sanger van die Vaaldriehoek het sedertdien soos ‘n veldbrand op sosiale media versprei. Boodskappe en huldeblyke het van oral ingestroom.

Vernon se gesondheidsprobleme het in 2022 begin toe hy ‘n maagseer ontwikkel het wat nie wou genees nie.

Dit het sy krag dreineer en ‘n groot impak op sy optredes gehad. Hy het ook baie gewig verloor.

Hy is later met kanker gediagnoseer, maar het die laaste jare steeds gereeld opgetree terwyl hy soms in erge pyn was.

Vernon, ‘n Kapenaar van geboorte, het in 2012 na Vanderbijlpark verhuis en vinnig begin naam maak in die Vaaldriehoek.

Vernon het reeds op 12-jarige ouderdom begin kitaarspeel en sing. Hy het later ook die klavier bemeester.

Sy musiekfondasie was oorspronklik Jazz, RnB en Soul-genres. In 2012 het die Country-musiek gogga hom gebyt.

Hy was gedurende sy sangloopbaan met verskeie gesogte nasionale Country-musiektoekennings vereer en het met sy optredes in die Vaaldriehoek diep in sy aanhangers se harte ingekruip.

“Die lewe toets tans my uithouvermoë, maar ek vertrou die Here in alles wat ek doen… in die helder én in die donker tye,” het Vernon tydens ‘n onderhoud met Vaalweekblad ‘n paar jaar gelede gesê.