VAALPARK – ’n Eenvoudige daad van medelye het die lewe van ’n jong Jack Russell-kruising onherkenbaar verander nadat sy onlangs in ’n haglike toestand by ’n plaaslike stortingsterrein gered is.

Die hondjie, wat intussen die troetelnaam Dumpling gekry het, is by die stortingsterrein gevind waar sy aan ’n boom vasgemaak was.

’n Onbekende man het probeer aanspraak maak op die hond, maar dit was vir omstanders duidelik dat sy dringend mediese sorg en liefde nodig gehad het.

Die lot van die weerlose hondjie het die hart van ’n goedhartige vrou aangegryp.

Sy het dadelik ingegryp en met die man begin onderhandel, waarna hy die hondjie gelukkig sonder enige verdere teëstribbeling aan haar oorhandig het.

Dumpling is dadelik in die sorg van Vaalpets geplaas waar sy nou veilig is en vertroetel word.

Ten spyte van haar traumatiese begin, het hierdie pragtige, lewenslustige hondjie reeds almal by die skuiling se harte gesteel.

Die personeel beskryf haar as ’n bondeltjie vreugde met ’n besonderse sagte geaardheid.

Van ’n verwaarloosde, eensame hondjie aan ’n boom, is Dumpling se storie die bewys dat daar steeds mense met groot harte in die Vaaldriehoek is.