PARYS – Die openingsronde van die 2026 Suid-Afrikaanse Rally-Raid kampioenskap (SARRC), die INGCO Parys 400 is op 19 en 20 Junie hier aangebied.

Dit was die agste keer dat dié wedren in die Parys-omgewing aangebied word.

Die 2026 INGCO Parys 400 het in een van die naasbestes in die geskiedenis van dié byeenkoms geëindig.

Die topklas-wenners van die onderskeie afdelings is:

* Algehele wenners & Ultimate FIA T1+-klas: Die verdedigende kampioen Saood Variawa en navigator Charan Moore van Toyota Gazoo Racing SA (TGRSA) agter die stuur van die Toyota GR Hilux IMT EVO het ’n algehele tyd van 05:56:31 aangeteken en die Ford-paar, Gareth Woolridge en Boyd Dreyer, met ’n skamele 29 sekondes uitgestof. TGRSA het ook die gesogte Vervaardigers-toekenning vir die ronde opgeraap.

* Ultimate SA T1+-klas: Lood du Preez en Adriaan Roets aan die stuur van die Farmer’s Meat Century Racing CR6. Hulle het op die laaste dag ’n ongelooflike inhaalstryd gevoer en 10 plekke opgeskuif om die klasoorwinning net 118 sekondes voor die jaagpak te beklink.

* T1 Adventure-klas: Peet Victor en Van Zyl Jonck wat die Red-Lined Motorsport VK50 beman het. Hulle het ’n skitterende terugvegoorwinning gevier nadat hulle ’n duur wielruiling tydens Vrydag se kwalifiserende skof moes oorkom.

* Challenger-klas: Die veteraan-paar Geoff Minnitt en Rodney Burke agter die stuur van hul Hydro Power Equipment Maverick R.

Die hoë-intensiteit tydrenaksie was weer eens oor twee provinsies gehou, hoewel die grootste deel van die roete naby Parys in die Vrystaat was.

Die 200 km-roete het jaers deur ’n mengsel van modderige dele, oop grasvelde en tipiese Vrystaatse mielieland-terrein geneem, wat goeie kykgenot aan toeskouers gebied het.

Daar was natuurlik ook vele plaaslike fotograwe wat nie die kans deur hul vingers laat glip het om mooi aksiefoto’s te neem nie.

Hier is van die foto’s wat aan Vaalweekblad verskaf is.