DBV Inspekteur red diere van brand dood
Sy het vinnig gedink, hulp ingeroep en vele beeste van 'n veldbrand gered.
VANDERBIJLPARK – Inspekteur Lycinda Visser van die DBV Vereeniging was Sondag op pad werk toe. By die Mullerstuine Kleinhoewes het sy ʼn veldbrand gesien wat vinnig versprei het.
Lysinda het dadelik besef daar is diere in gevaar. Nadat sy vasgestel het dat die kleinhoewe eienaar nie tuis was nie, het sy dadelik tot aksie oorgegaan.
Sy het die beeste na veiligheid gelei voordat die vuur hul oorval het. Sy het ook die Vaal Reaction Unit en Droogte Dolla gekontak. Lede van beide organisasies was gou op die toneel om te help.
Die diere is na veilgiheid geneem en hulle is van kos voorsien.
Die Vereeniging & Vanderbijlpark DBV het op hul Facebookblad die Vaal Reaction Unit en Droogte Dolla bedank vir hul vinnige optrede, spanwerk en deernis waarmee hul gehelp het.
“Dis insidente soos hierdie wat ons herinner dat die beskerming van diere ʼn gedeelte verantwoordelikheid is en dat lewens gered kan word, wanneer almal saamwerk. Ons is ongelooflik trots op Inspekteur Visser,” het die plasing gelui.
