Wow! Dit was ‘n wow-vertoning
The Staccatos het die gehoor op hul voete gehad na hul vertoning by die Etienne Rousseau Teater.
SASOLBURG – Die Etienne Rousseau Teater was Sondagmiddag in rep en roer. Nog voor The Staccatos hul verskyning op die verhoog gemaak het, het die toejuiging al begin.
Die gehoor het meestal uit mense ouer as 50 bestaan. Vir amper twee ure het ieder en elk weer in Rockers ontaard. Daar is saamgedans, hande geklap en gesing.
Steve Ashley en Brian Le Gassick weet hoe om die gehoor te verplaas na ‘n ander era waar rock and roll nog baas was.
The Staccatos bestaan nie verniet al 65 jaar nie. Musiek van Roy Orbison, The Beatles, CCR, Neil Diamond en Elvis Presley is meesterlik vertolk. Die twee manne kan nie net sing nie, hulle het kort-kort die hele gehoor aan die lag gehad.
Ekstra spesiaal was natuurlik hul eie treffers wat hul gesing het. Van hul heel eerste treffer, Come Back Silly Girl tot by Butchers en Bakers het opgeklink.
Hul grootste treffer ooit, Cry to me, het hul vir laaste gebêre. Die lied het in 1969 die Springbok Radio Hit Parade getref en vir 38 weke die trefferparade oorheers.
Uiteindelik het hul vier Gold Discs gekry nadat meer as 400 000 plate in Suid-Afrika verkoop is. Cry to me het ook trefferparades in Duitsland en die Verenigde Koninkryk gehaal en word tot vandag toe deur radiostasies gespeel.
