VEREENIGING – “Hoe begin ‘n mens praat wanneer jou hart so te sê sil gaan staan as hulle haar wonde skoonmaak. Haar gesiggie word bleek, haar handjies yskoud en dis ‘n gehuil en geskree van die pyn,” sê Jenny Stander, klein Jennifer se ouma.

“Selfs wanneer hulle nuwe verbande opsit skree sy: help my ouma dit is seer.”

Klein Jennifer se liggaampie het tydens die laaste skoonmaak van die wonde in skok gegaan, en sy het gebraak van die pyn.

Daar word tans probeer om haar na die Chris Hani Baragwanath Hospitaal oor te plaas, maar elke keer as hulle daar met haar opdaag, word sy terug gestuur omdat haar gewig nie reg is nie en sy ook nie sterk genoeg is vir nog ‘n oprasie nie.

“Ek vra almal vir hulp. My hart breek en die trane loop, want wat meer kan ‘n mens doen om seker te maak haar ouma het petrolgeld om elke dag by haar te wees,” sê Helena Lombaard (‘n vriendin van ouma Jenny).

Jennifer wil bitter graag net huis toe gaan, maar daar lê nog ‘n lang pad na herstel, en baie pyn vir die kleinding voor.

Agtergrond

Die kleuter het by haar ouerhuis op die Mooilande-kleinhoewes tussen Vereeniging en Meyerton oor iets gestruikel en agteruit in ’n 25l emmer kookwater geval.

Sy het derdegraadse brandwonde aan haar maag, rug, bo- en binnebene, boude en privaatdele opgedoen.

Daar is aanvanklik vir haar lewe gevrees toe haar liggaampie weens ’n ernstige infeksie in skok gegaan het. Dokters het reguit gesê dat slegs ’n wonderwerk en gebede haar sou deursien.

Hoewel Jennifer aanvanklik begin herstel het, is sy tans in konstante pyn – selfs wanneer sy verdoof word tydens die skoonmaakproses.

Sy sal na verwagting nog minstens drie operasies moet ondergaan vir veloorplantings en die verwydering van dooie weefsel.

Indien enigeen die gesin finansieel kan bystaan om met Jennifer se mediese onkostes te help, kan Helena Lombaard (wat namens die gesin optree) gekontak word by 071 932 3933.

Skenkings kan ook direk op BackaBuddy gemaak word:

https://www.backabuddy.co.za/campaign/help-jennefer-continue-her-fight