MEYERTON– Meyerton parkrun bereik Saterdag, 8 Augustus, ‘n besondere mylpaal wanneer die gemeenskap se gewilde weeklikse 5 km-geleentheid vir die 350ste keer aangebied word.

Om die geleentheid te vier, word deelnemers aangemoedig om in swart en wit aan te trek, terwyl die roete ook vir die dag in omgekeerde rigting gehardloop sal word as deel van die spesiale “Reverse Run”-tema.

Die eerste oriëntering vir nuwe deelnemers begin om 07:45, waarna die parkrun om 08:00 by die Midvaal-sportterrein afskop. Almal, jonk en oud, is welkom om te stap, draf, hardloop of as vrywilliger betrokke te raak.

Meyerton parkrun het op 18 November 2017 vir die eerste keer plaasgevind en het sedertdien ‘n gewilde Saterdagoggend-tradisie vir honderde inwoners geword. Organiseerders nooi die gemeenskap om saam die 350ste mylpaal te kom vier.