Eureka sportdag weer ‘n treffer
Die deelnemers het van so ver as Bloemfontein, Welkom en Brakpan gereis vir Eureka Skool se jaarlikse Spesiale Sportdag.
VEREENIGING – Dit is elke jaar ʼn hoogtepunt op menige se kalender, die Eureka Skool se Sportdag. 28 Augustus was dit weer so. Die personeel van Eureka beplan maande om hierdie dag elke jaar te reël en hul het hulself weer eens oortref.
By die 500 kinders van 16 skole en sentrums vir persone met verstandelike gestremdhede het die byeenkoms bygewoon.
Studende, dosente en mascot Eagie van die NWU Vanderbijlpark kampus het kom hand bysit, terwyl leerders van die Vaalpark High School ook ondersteuning kom bied het.
Die items is van so aard dat soveel as moontlik kinders kan deelneem, selfs die wat nie kan loop nie of wie se bewegings baie beperk is.
Die dag is afgeskop met die kruipresies waar twee kinders op ʼn slag teen mekaar gekruip het. Die kleingoed het dit baie geniet, maar ʼn hele paar van die omstanders het trane afgevee.
Dis opgevolg met rolstoelresies, naellope, balskop, doelgooi en balslaan-aksies op die veld.Elke deelnemer het ʼn medalje ontvang en almal is onder luide toejuiging aangemoedig.
