DE DEUR – Twintig leerders het geringe beserings opgedoen toe ’n minibustaxi en ’n bus met leerders Dinsdag in De Deur gebots het.

Die beseerde kinders is ná die ongeluk deur nooddienste na ’n plaaslike kliniek geneem, waar hulle mediese behandeling ontvang het.

Geen sterftes is aangemeld nie.

Konst. Mampho Mahlomola, polisiewoordvoerder, sê die De Deur-polisie het ’n saak van roekelose en nalatige bestuur geopen.

Die polisie ondersoek nog die omstandighede rondom die botsing en probeer vasstel wat in die aanloop tot die ongeluk gebeur het.

Mahlomola het motoriste ná die voorval gemaan om te alle tye waaksaam te wees en verkeersreëls na te kom om die veiligheid van alle padgebruikers te help verseker.

Die ondersoek duur voort.