VANDERBIJLPARK – 21 September is Wêreld-Alzheimersdag. Solidariteit Helpende Hand se Vanderbijlpark-tak het Huis Siësta se versorgingseenheid vir verswakte bejaardes besoek en ʼn paar uur saam met die inwoners wat aan demensie en Alzheimer se siekte ly spandeer.

Die span van Solidariteit Helpende Hand het die oggend se verrigtinge begin met musiek uit die 60’s en het dadelik ingeval en lekker gedans. Van die inwoners het spoedig saamgedans en hande geklap.

Toe Hound Dog van Elvis Presley opklink, het breë glimlagte verskyn. Die musiek was na aan hul hart, uit ʼn era toe hulle nog kon twist en tiekiedraai.

Na al die dansery, wat ʼn hele paar van die besoekers uitasem gemaak het, het almal nader geskuif na die tafels toe. Hier het elkeen ʼn cupcake ontvang en met ʼn verskeidenheid van eetbare blinkertjies, sterretjies en aangemaakte versiersuiker in helder blou, geel en pienk, kon elkeen ʼn cupcake versier en natuurlik ook eet.

Almal het die tydverdryf baie geniet, selfs takvoorsitter Johann Viljoen en Vaalweekblad se joernalis het ingespring en ywerig hul cupcakes met versiersuiker bygedam. Na die ietwat taai, maar suikersoet kapperjolle, is daar rustig prente ingekleur.

Een tannie het die span ʼn paar maal bedank vir hul moeite en ʼn ander het, terwyl sy haar tweede prentjie in groen en geel tooi, verklaar: “Dit is die lekkerste dag in my lewe.”