Axel, afgelaai en vergeet
Ondanks sy verlede het die pyn van agtergelaat wees, nie klein Axel se lewenslus gedemp nie.
VANDERBIJLPARK – Dis moeilik om te glo dat iemand ‘n hondjie soos Axel sommer net kon vergeet.
Hierdie spelerige Jack Russell-kruising het ‘n reuse persoonlikheid en ‘n hartjie wat oorloop van liefde. Boonop is hy ‘n pragtige hondjie wat sommer vinnig aandag trek.
Sy vorige eienaar het hom na Vaalpets geneem met die versoek dat hy net vir een nag bly terwyl “persoonlike probleme” uitgesorteer word.
Dié eienaar het egter nooit weer teruggekeer nie.
So het ‘n tydelike blyplek Axel se nuwe werklikheid geword.
Vandag wag hy nog steeds by Vaalpets op ‘n eienaar wat hom ‘n permanente, liefdevolle heenkoms sal bied.
Axel word beskryf as ‘n hondjie wat maklik met ander honde vriende maak.
“Hierdie soet hondjie verdien ‘n huis waar hy met liefde oorstroom sal word. Hy het ‘n eienaar nodig wat nie beloftes verbreek nie en vir hom sal wys hy was wél die moeite werd om voor terug te kom,” sê Vaalpets.
Indien daar iemand is wat aan hierdie vereistes kan voldoen en Axel graag wil aanneem, kontak:
Hayley: 072 412 9923
Andey: 079 140 3041
