GAUTENG – Die Gautengse Vervoerinspektoraat sê hy het tussen 14 en 20 September altesaam 69 minibus-taxi’s as onpadwaardig verklaar en nog 19 geskut omdat hulle nie aan minimum veiligheidsvereistes voldoen het nie.

Volgens die Gautengse departement van paaie en vervoer het beamptes ook 70 taxi’s sonder geldige lisensieskyfies en 104 bestuurders sonder geldige bestuurslisensies aangetref. Die operasie is saam met die Padverkeersbestuurskorporasie en ander wetstoepassingspanne op besige taxiroetes uitgevoer.

Foute aan voertuie het gebrekkige remme, verslete bande en stukkende ligte en flikkerligte ingesluit. Beamptes het 1 496 AARTO-boetes uitgereik en vyf mense in hegtenis geneem: drie in verband met omkopery en twee ingevolge die Immigrasiewet.

Kedibone Diale-Tlabela, Gautengse LUR vir paaie en vervoer, sê bestuurders en voertuie wat nie aan die wet voldoen nie, sal van die paaie verwyder word.