VEREENIGING – Kiesers van Wyk 1 van die Emfuleni Plaaslike Munisipaliteit (Drie Riviere) wat voorheen by Hoërskool Drie Riviere gestem het, sal tydens vanjaar se plaaslike verkiesing by Laerskool Drie Riviere stem.

Die nuwe stemlokaal is op die hoek van Umgeni- en Limpopostraat in Drie Riviere.

Dalene Venter, wyksraadslid vir Wyk 1, het die verandering aan Vaalweekblad bevestig. Laerskool Drie Riviere word ook op die Onafhanklike Verkiesingskommissie (OVK) se webwerf as die stemlokaal aangedui.

Die verandering raak kiesers wat voorheen by die hoërskool gestem het, en nie alle kiesers in Wyk 1 nie.

Kiesers kan hul geregistreerde stemlokaal nagaan deur hul ID-nommer op die OVK se webwerf in te voer.