OPDATERING: 13:50, 2026/10/16

Leeu opgespoor, sê polisie; vangs nog nie bevestig

Die polisie sê die leeu wat in Vereeniging en omliggende gebiede opgemerk is, is opgespoor. Teen publikasietyd het hulle egter nog nie aan Vaalweekblad bevestig of die dier gevang of hervestig is nie.

Volgens ’n verklaring wat die polisie op 15 Oktober uitgereik het is reëlings deur die betrokke kundiges getref om die dier veilig na ’n beveiligde omgewing te verskuif.

Die verklaring meld nie waar of wanneer die leeu opgespoor is nie. Dit bevestig ook nie dat die hervestiging reeds plaasgevind het nie.

Vaalweekblad het Vrydagoggend verdere besonderhede aangevra, onder meer oor die dier se ligging, of dit gevang is en waarheen dit verskuif sou word.

Die kommunikasiebeampte, sers. SJ Motsapi, het aangedui dat hy sou terugvoer gee. Teen publikasietyd was dié antwoorde steeds uitstaande.

Volgens die polisieverklaring is die dier se eienaar steeds onbekend en dit kon ook nog nie vasgestel word waar die dier vandaan kom nie.

Intussen is huurders in Redan in ’n boodskap gewaarsku dat die leeu nog nie gevang is nie en steeds rondbeweeg.

Die boodskap van DBVest, die maatskappy wat Redan bestuur, vra huurders om hul bewegings te beperk en nie onbevestigde waarnemings of KI-gegenereerde foto’s te versprei nie.

Volgens die waarskuwing moet elke beweerde waarneming deur die grondspan ondersoek word, wat tyd en hulpbronne verg.

Die boodskap meld ook dat ’n aandklokreël en beperkings op beweging en toegang ingestel is om huurders en wagte te beskerm.

Die polisie se verklaring van 15 Oktober lui dat die leeu opgespoor is, maar bevestig nie dat dit gevang is nie. Vaalweekblad wag steeds op verdere besonderhede van die polisie.

Intussen is huurders in Redan in ’n boodskap gewaarsku dat die leeu nog nie gevang is nie en steeds rondbeweeg.

REDAN – Die leeu wat sedert Woensdagoggend in die Redan-omgewing rondbeweeg het, is volgens die polisie opgespoor en sal na ’n veilige omgewing verskuif word.

Die polisie het Donderdag in ’n verklaring bevestig dat die dier opgespoor is en dat die nodige reëlings deur die betrokke kundiges getref is om hom veilig te hervestig.

Volgens die polisie is hulle op Dinsdag 13 Oktober omstreeks 04:00 deur ’n lid van die polisie se honde-eenheid van ’n sosialemediaplasing oor ’n leeu wat glo in ’n afgeleë gebied rondloop, in kennis gestel.

Die polisie by Vereeniging het daarna saam met die honde-eenheid en ander rolspelers, waaronder private veiligheidsmaatskappye se hommeltuigoperateurs, hulpbronne gemobiliseer om die dier op te spoor.

Die leeu se eienaar is steeds onbekend en die polisie ondersoek waar die dier vandaan kom.

Die polisie het ook kommer uitgespreek oor die verspreiding van vals en onbevestigde inligting op sosiale media, wat volgens hulle onnodige paniek veroorsaak het.

Inwoners van Sedibeng en omliggende gebiede word versoek om kalm te bly, nie onbevestigde berigte te versprei nie en op amptelike kommunikasie staat te maak terwyl die owerhede en wildkundiges die operasie veilig afhandel.