VANDERBIJLPARK. – Die Hoërskool Transvalia se ‘Awesome Foursome’  Martin Papworth, Aiden Leeb, Damian Araujo en Anton van Dam het op 22 Mei geskiedenis gemaak toe hulle gekwalifiseer het vir die SA Hoërskole Gholftoernooi wat van 1 tot 4 Augustus in Port Elizabeth by die Humewood Buiteklub plaasvind.

Dié viermanskap het die top gholfskole in die Sentraal Gauteng streek soos St Stithians, St Peters, Curro Aurora van Randburg asook BSI (‘n top internasionale gholfskool) uitgestof om te kwalifiseer.

Wat hierdie prestasie so spesiaal maak is dat dit die eerste keer in Transvalia en die Vaaldriehoek se geskiedenis is dat ‘n plaaslike skool vir die nasionale toernooi kon kwalifiseer. Slegs die top twee skole van elke provinsie dring deur.

Dit was ‘n spanpoging soos min en hoewel Papworth (69) met die laagste rondte van die die dag gespog het, het Leeb, Araujo en van Dam, meer as hul kant gebring om die knoop deur te haak.