SASOLBURG. – Atletiek Vaaldriehoek (AVT) het Saterdag (8 Oktober) sy eerste klubliga-byeenkoms in versengende hitte op die DP de Villiers-stadion aangebied.
Dié voorseisoen-byeenkoms is ‘n uitstekende geleentheid vir atlete wat vir die komende atletiekseisoen wil voorberei, of ‘n terugkeer na ‘n besering wil maak.
Hoewel die byeenkomste deur meeste atlete as ‘n litlosmaker aangewend word, het dit nie ‘n demper op die gehalte van atletiek geplaas nie. Sowat 12 atlete het meer 800 tabelpunte verdien.
Die top enkelprestasie van die dag is deur Elme Cronje opgedis.
Sy het 1 000 tabelpunte verdien nadat sy die 60m vir d.o/9 in ‘n spogtyd van 09.93s afgeblits het.
Brandon Mathews van Transvalia Atletiekklub het die 1.5kg diskus in die afdeling vir seuns o.15, 50.23m ver geslinger om 871 tabelpunte te verdien. Dit was die naasbeste prestasie van die dag.
– Vir die volledige uitslae besoek Atletiek Vaaldriehoek se Facebookblad.