VANDERBIJLPARK. – ‘n Lewensavontuur lê vir die Rhinoweek-spanne voor wat later vandeesweek vir ‘n rugbytoer na Skotland en Ierland vertrek.
Die petoorhandiging-seremonie het die naweek in Vanderbijlpark by die VUT Isak Steyl-stadion plaasgevind.

Die o.13’s se seremonie was Vrydagsaand eerste aan die beurt, waarna die o.17’s en o.18’s onderskeidelik Saterdag en Sondag hulle pette en uitrustings vir die toer ontvang het.
Die spanne is saamgestel uit die beste spelers van regoor die land wat tydens die winterskoolvakansie aan die onderskeie Rhinoweke in Vanderbijlpark deelgeneem het.

Daar is ook ‘n paar bekende gesigte van die Vaaldriehoek wat die onderskeie spanne gehaal het.
Die spanne het die naweek ook die geleentheid gekry om vir die eerste keer voor hul vetrek na Europa saam te oefen.

Dries van Heerden, die vader van die Rhinoweke, en sy vennote Martin en Cathy van Wyngaardt het die afgelope paar maande rondgeskarrel om al die reis en logistieke reëlings te tref.
Hoewel vlugkaartjies en verblyf die afgelope paar maande amper verdubbel het, het Rhinoweek se bestuur ‘n haas uit die hoed gepluk om te verseker dat die toer voortgaan.

Weens toenemende finansiële druk wêreldwyd gaan oorsese rugbytoere soos hierdie waarskynlik binnekort uitsterf. Dit besef die spelers, ouers en afrigters terdeë.